បំនិនអាជីវកម្ម | February 24, 2023

មហាសេដ្ឋីជាច្រើនមានលោក Bill Gates ជាដើមនិយាយដូចៗគ្នាពីទម្លាប់និងដំណើរនៃការកសាងទ្រព្យសម្បត្តិ

មនុស្សដែលបានបង្កើតលាភសំណាងរហូតដល់ក្លាយជាមហាសេដ្ឋីតាំងពីលោក Rockefeller រហូតដល់លោក Gates សុទ្ធតែបានធ្វើឱ្យពិភពលោកនេះ ផ្លាស់ប្តូរ។ ដើម្បីសម្រេចបានជោគជ័យកម្រិតនេះគេត្រូវមានទាំងការព្យាយាមការប្តេជ្ញាចិត្តនិងសំណាងខ្លះដែរ។ ទោះជាយ៉ាងណាមហាសេដ្ឋីទាំងនេះក៏មិនបានលាក់អាថ៌កំបាំងអ្វីក្នុងដំណើរបង្កើតលាភសំណាងទាំងអស់នេះទេ ហើយមនុស្សទាំងអស់ក៏អាចរៀនអនុវត្ត តាមគន្លឹះមួយចំនួនដើម្បីទទួលបានជោគជ័យក្នុងកម្រិតណាមួយដែលចង់បានដែរ។

ទោះជាគោលដៅរបស់អ្នកចង់បង្កើតរកលុយឱ្យបានរាប់ពាន់លានដុល្លារ ឬចង់នាំទឹកស្អាតទៅឱ្យមនុស្សរាប់ពាន់លាននាក់ ក៏អ្នកអាចប្រើប្រាស់គន្លឹះទាំងនេះពីមាត់របស់មហាសេដ្ឋីផ្ទាល់៖

១/ សម្លឹងមើលបរាជ័យឱ្យចំភ្នែក

បរាជ័យមិនមែនជាអ្វីដែលអ្នករំពឹងចង់ជួបនោះទេ ប៉ុន្តែមហាសេដ្ឋីទាំងអស់សុទ្ធតែធ្លាប់ជួបបរាជ័យក្នុងរបៀបផ្សេងៗ។ ភាពខុសគ្នារវាងមនុស្ស ដែលរីកចម្រើន និងមនុស្សដែលមិនរីកចម្រើនស្ថិតនៅត្រង់ថាមនុស្សដែលរីកចម្រើនបរាជ័យធ្វើឲ្យគេកាន់តែប្រសើរឡើង។ លោក Bill Gates ធ្លាប់និយាយថា ការសាទរជោគជ័យជារឿងល្អ ប៉ុន្តែរឿងដែលសំខាន់ជាងនេះគឺត្រូវយកចិត្តទុកដាក់ចំពោះមេរៀនពីបរាជ័យ។

មនុស្សច្រើននាក់ណាស់ដឹងថាលោក Gates ក្លាយជាមហាសេដ្ឋី និងល្បីឈ្មោះដល់សព្វថ្ងៃនេះដោយសារការបង្កើតក្រុមហ៊ុន Microsoft ប៉ុន្តែប្រហែលមានមនុស្សតិចនាក់ណាស់ដែលដឹងថាលោក Gates ធ្លាប់បង្កើតក្រុមហ៊ុន Traf-O-Data ហើយក៏ដួលរលំទៅវិញ នៅចុងទសវត្សឆ្នាំ១៩៧០។ ប៉ុន្តែគឺមេរៀនពីបរាជ័យនោះហើយដែលជួយឱ្យក្រុមហ៊ុន Microsoft ទទួលបានជោគជ័យ។

មនុស្សមានមហិច្ឆតាជាច្រើននាក់នៅពេលជួបបរាជ័យគេតែងតែចង់បំភ្លេចរឿងឈឺចាប់នោះរួចបន្តដំណើរទៅមុខទៀត។ ប៉ុន្តែគន្លឹះដើម្បីជោគជ័យគឺការមានសមត្ថភាពប្រឈមមុខនឹងបរាជ័យ ហើយយល់មេរៀនពីបរាជ័យនោះ។ មនុស្សជោគជ័យបំផុតទទួលស្គាល់ថាបរាជ័យជាជណ្តើរជាន់ទៅកាន់តែខ្ពស់មិនមែនជារបាំងបិទផ្លូវទេ។

២ ជម្នះធ្វើឱ្យបានអស្ចារ្យ

ភាពអស្ចារ្យសម្រាប់មនុស្សជោគជ័យបំផុតគឺទម្លាប់។ លោក Mohammad Dewji ជាមហាសេដ្ឋីវ័យក្មេងរបស់ទ្វីបអាព្រិចនិយាយថា “ព្យាយាមធ្វើឱ្យបានអស្ចារ្យនៅក្នុងជីវិត ហើយមិនត្រូវទុកចន្លោះសម្រាប់កិច្ចការកម្រិតធម្មតាៗទេ។ កំណត់គំរូរបស់អ្នកឱ្យបានខ្ពស់ ហើយការព្យាយាមរបស់អ្នកនឹងទទួលបានផលតបស្នងមកវិញយ៉ាងពេញចិត្ត។”

គោលដៅវែងឆ្ងាយអាចនឹងមានទំហំធំពេក ឬមានភាពមិនច្បាស់លាស់។ ប៉ុន្តែការក្រោកពីគេងរាល់ព្រឹកហើយខិតខំធ្វើការឱ្យដល់កម្រិតខ្ពស់បំផុតជាប្រចាំដែលលោកអ្នកបានកំណត់ទុកជាគន្លឹះដើម្បីជោគជ័យ។ លុយខ្ទង់ពាន់លានចាប់ផ្តើមពីលុយខ្ទង់លានដែលមានមូលដ្ឋានពីខ្ទង់សែន ខ្ទង់ម៉ឺន ខ្ទង់ពាន់ ខ្ទង់រយ និងខ្ទង់រាយ ហើយលុយដំបូងគេគឺទទួលបានមកដោយសារការប្រឹងប្រែងធ្វើឱ្យបានល្អឥតខ្ចោះ។

កំពូលសហគ្រិនជោគជ័យបង្កើតគោលដៅត្រូវនិងសម្រេចគោលដៅទាំងនោះរាល់ថ្ងៃ។ តាមរយៈការអនុវត្តទៀងទាត់ គេអាចបង្កើតបានជាទម្លាប់ត្រូវ។ ទីបំផុតទម្លាប់ត្រូវទាំងអស់នេះក៏ក្លាយទៅជាសមិទ្ធផលត្រូវ។

៣/ ទស្សនវិស័យជាគន្លឹះ

ទិដ្ឋភាពមួយទៀត ក្នុងការក្លាយខ្លួនជាមហាសេដ្ឋីគឺការកំណត់គោលដៅត្រូវ។ ការបង្កើតគំនិតល្អៗ ដែលគួរដល់ការព្យាយាមមានន័យថាជាការគិតឱ្យហួសពីរបៀបធម្មតា និងការមើលឃើញគុណតម្លៃក្នុងកន្លែងដែលមនុស្សទូទៅមើលមិនឃើញ។ គំនិតដែលបង្កើតមហាសេដ្ឋីជាគំនិត ដែលរុញច្រានព្រំដែននៃគំនិតរបស់មនុស្សធម្មតា។

ឧទាហរណ៍ជាក់ស្តែងនៅពេលមហាសេដ្ឋី Richard Branson បង្កើតក្រុមហ៊ុនអាកាសចរណ៍ Virgin Airlines ដើម្បីប្រកួតប្រជែង ជាមួយក្រុមហ៊ុនធំៗ លោករងការសើចចំអកច្រើន។ អ្នកខ្លះទៀតប្រមាថលោក Branson ដែលហ៊ានប្រជែងជាមួយក្រុមហ៊ុនអាកាសចរណ៍ដែលមានស្រាប់។ ទោះជាយ៉ាងណាលោក Branson បានមើលឃើញតម្រូវការនៃក្រុមហ៊ុនអាកាសចរណ៍តម្លៃថោកដែលផ្តោតលើសេវាបម្រើអតិថិជនជាធំ។ លោក Branson មានជំនឿចិត្តក្នុងទស្សនវិស័យរបស់លោកបើទោះបីជាក្រុមហ៊ុនដែលលោកបានបង្កើតឡើងហើយជួបបញ្ហាខ្លះៗក្នុងពេលពីរបីឆ្នាំដំបូងក៏ដោយ។ លោក Branson បានដឹងថា មនុស្សដទៃសង្ស័យចំពោះគំនិតរបស់លោក ប៉ុន្តែលោកបានទុកចិត្តលើការវាយតម្លៃរបស់ខ្លួនឯង។

៤/ សុខភាពជារឿងសំខាន់

គ្មានកិច្ចប្រឹងប្រែងតម្លៃរាប់ពាន់លានដុល្លារណាអាចទៅមុខរួចដោយមិនមានសុខភាព និងឆន្ទៈនៅពីក្រោយនោះទេ។ អ្នកជំនាញខាងថែទាំរាងកាយនិងមហាសេដ្ឋី Samir Becic និយាយថា “ខ្ញុំជឿជាក់ថានៅក្នុងសតវត្សទី២១នេះ ដើម្បីធ្វើជាមនុស្សខ្លាំងពូកែក្នុងពិភពលោកនេះ លអ្នកត្រូវតែមានសុខភាព និងចេះថែទាំរាងកាយ។ មហាសេដ្ឋីទាំងអស់តាំងពីស្ថាបនិកក្រុមហ៊ុន Under Armour រហូតដល់លោក George Soros ដែលមានវ័យ៨៦ឆ្នាំទៅហើយសុទ្ធតែសង្កត់ធ្ងន់លើសារៈសំខាន់នៃសុខភាពផ្ទាល់ខ្លួន។

គំនិតរបស់អ្នកនឹងមិនអាចប្រែក្លាយទៅជាអ្វីកើតទេបើអ្នកមានជំងឺច្រើន និងមិនមានសុខភាពល្អ។ អ្នកនឹងមិនមានថាមពលដើម្បីធ្វើកិច្ចការទាំងអស់នៅក្នុង បញ្ជីការងារដែលត្រូវធ្វើ។ យុទ្ធសាស្រ្តកាត់បន្ថយសម្ពាធអារម្មណ៍របបអាហារដើម្បីសុខភាព និងលំហាត់ប្រាណជាប្រចាំនឹងជួយបង្កើតសមត្ថភាពរាងកាយព្រមទាំងជំរុញទឹកចិត្តអ្នកឱ្យធ្វើការពេញសក្តានុពល។ សូមចងចាំថា បើទោះជាក្នុងការបំពេញសុបិនរបស់អ្នកសុខភាពជាគន្លឹះមិនអាចខ្វះបាន។

៥/ ឱកាស + ការប្រុងប្រៀប = សំណាង

អ្នកប្រហែលភ្ញាក់ផ្អើលថា សំណាងច្រើនតែកើតឡើងចំពោះមនុស្សដែលខិតខំធ្វើការ ប៉ុន្តែវាជាកត្តាមួយក្នុងការក្លាយជាសមាជិករបស់ក្រុមមហាសេដ្ឋី។ លោក Mark Cuban ដែលបានលក់ក្រុមហ៊ុន Broadcast.com ក្នុងតម្លៃ ៥,៧ពាន់លានដុល្លារកាលពីចុងទសវត្សឆ្នាំ១៩៩០ បានសារភាពថា “ការធ្វើជាមហាសេដ្ឋីតម្រូវឱ្យមានសំណាងច្រើន និងការដើរត្រូវពេលវេលាច្រើន។” ពេលនេះការពឹងផ្អែកតែលើសំណាងម្យ៉ាងដើម្បីជោគជ័យគឺមិនអាចទៅរួចទេ។

ទោះជាយ៉ាងណាសមត្ថភាពទទួលស្គាល់ឱកាសយ៉ាងឆាប់រហ័ស និងក្នុងរបៀបដែលត្រូវធ្វើពេលឱកាសទាំងនោះបង្ហាញខ្លួន សមត្ថភាពដើម្បីបត់បែនទៅតាមដំណើរផ្លាស់ប្តូរនៅពេលចាំបាច់ និងការប្រុងប្រៀបខ្លួនសុទ្ធតែមានសារៈសំខាន់ក្នុងការទាញយកអត្ថប្រយោជន៍ពីស្ថានភាពដែលមនុស្សទូទៅគិតថា ជាសំណាង។

ប្រែសម្រួល៖ វេហា

ប្រភព៖ Entrepreneur

បញ្ចេញមតិ