បំនិនអាជីវកម្ម | March 06, 2023

មនុស្សជោគជ័យមួយចំនួនមិនលើកទឹកចិត្តឲ្យយើងលាឈប់ពីការងារទៅបើកអាជីវកម្មទេ

សហគ្រិនភាពកំពុងតែមានការពេញនិយមខ្លាំងដោយសារមនុស្សកាន់តែច្រើន កំពុងតែស្វែងរកការចាប់ផ្តើមធ្វើពាណិជ្ជកម្មផ្ទាល់ខ្លួន។ មនុស្សទាំងនេះមើលឃើញសហគ្រិនភាពជាមធ្យោបាយទទួលបានសេរីភាពវិជ្ជាជីវៈគឺការមានសមត្ថភាពដើម្បីជ្រើសរើស និងកំណត់ប្រាក់ខែផ្ទាល់ខ្លួនធ្វើការតាមគម្រោងដែលខ្លួនឯងស្រឡាញ់ និងគ្រប់គ្រងពាណិជ្ជកម្មតាមរបៀបផ្ទាល់ខ្លួន។ ទោះជាយ៉ាងណាសហគ្រិនភាពមានលក្ខណៈពិសេសលើសពីការត្រឹមតែមានលុយច្រើននិងពេលវេលាផ្ទាល់ខ្លួនទៅទៀត។

សហគ្រិនជោគជ័យសព្វថ្ងៃនេះជឿថា មនុស្សមិនគួរលាឈប់ពីការងារប្រចាំថ្ងៃទៅចាប់ផ្តើមបង្កើតពាណិជ្ជកម្មផ្ទាល់ខ្លួនទេ។ ជាក់ស្តែងអ្នកនិពន្ធល្បីឈ្មោះ និងសហគ្រិនជើងចាស់ Daniel DiPiazza មិនចង់លើកទឹកចិត្តមនុស្សដែលលោកជួបឱ្យលាឈប់ពីការងារដើម្បីទៅបង្កើតពាណិជ្ជកម្មផ្ទាល់ខ្លួនទេ។ ខាងក្រោមនេះជាហេតុផលខ្លះនិងរបៀបថ្លឹងថ្លែងថា អ្នកគួរតែជ្រើសរើសសហគ្រិនភាពឬយ៉ាងណា៖

១/ តើសហគ្រិនភាពត្រូវនឹងចរិតលក្ខណៈរបស់អ្នកឬទេ?

ការថ្លឹងថ្លែងរកមើលថា សហគ្រិនភាពជាផ្លូវត្រូវឬមិនត្រូវសម្រាប់លោកអ្នកអាចជាការលំបាក។ ពិតណាស់ថាសហគ្រិនភាពមានលក្ខខណ្ឌល្អច្រើន ប៉ុន្តែអ្នកក៏គួរតែកត់សម្គាល់ដែរថា ការក្លាយទៅជាចៅហ្វាយនាយរបស់ខ្លួនឯងមិនមែនមានន័យថា អ្នកអាចអង្គុយនៅស្ងៀមមិនចាំបាច់ធ្វើកិច្ចការអ្វីទាំងអស់នោះទេ។ ការពិតផ្ទុយស្រឡះពីការគិតរបៀបនេះ។

ក្នុងនាមជាសហគ្រិនអ្នកនឹងត្រូវមើលនិងរៀបចំកិច្ចការគ្រប់យ៉ាង ជាពិសេសនៅក្នុងដំណាក់កាលចាប់ផ្តើមដំបូងៗ។ ការពិតខ្លះដែលអ្នកគួរតែដឹង ពីដំបូងទៅគឺ៖

-អ្នកនឹងមិនធ្វើការតិចម៉ោងជាងមុនទេ ប៉ុន្តែត្រូវធ្វើការកាន់តែច្រើនម៉ោងថែមទៀត

-ការគ្រប់គ្រងពាណិជ្ជកម្មដោយខ្លួនឯងមានហានីភ័យខ្ពស់ជាងពេលធ្វើការឱ្យគេ

-អ្នកនឹងត្រូវដើរតួច្រើនរាល់ថ្ងៃ

-អ្នកនឹងត្រូវបត់បែន ហើយរៀនជំនាញថ្មីៗយ៉ាងរហ័សដើម្បីសម្រេចគោលដៅ

បើអ្នកកំពុងតែគិតចង់បង្កើត ពាណិជ្ជកម្មផ្ទាល់ខ្លួនមែនអ្នកត្រូវច្បាស់ថា អ្នកកំពុងតែធ្វើដើម្បីហេតុផលត្រឹមត្រូវហើយសូមដឹងជាមុនថា ក្នុងករណីជាច្រើន ការបើកពាណិជ្ជកម្មថ្មីមានន័យថា ជាប្រតិបត្តិការ២៤ម៉ោងក្នុងមួយថ្ងៃនិង៧ថ្ងៃក្នុងមួយសប្តាហ៍។

២/ ការជ្រើសរើសពេលវេលាត្រូវសម្រាប់លាឈប់ពីការងារ

បើអ្នកបានគិតច្បាស់លាស់និងសម្រេចចិត្តថា ចង់ធ្វើតាមសុបិននៃការបង្កើតពាណិជ្ជកម្មមួយដោយខ្លួនឯងមែន អ្នកត្រូវស្វែងរកពេលវេលា ត្រឹមត្រូវដើម្បីលាឈប់ពីការងារបច្ចុប្បន្ន។ មនុស្សជាច្រើនយល់ថា ដំណាក់កាលនេះជាពេលលំបាកសម្រេចចិត្តថាតើគួរតែប្រថុយហក់លោតឬយ៉ាងណា ឬមួយក៏ត្រូវរង់ចាំហើយបន្តធ្វើកិច្ចការទាំងពីរក្នុងពេលតែមួយ។

មុនពេលសម្រេចចិត្តហក់លោត អ្នកត្រូវបង្កើតប្រាក់ចំណូលច្បាស់លាស់ពីពាណិជ្ជកម្មថ្មីនោះសិន។ អ្នកជំនាញផ្តល់ដំបូន្មានមថា បើអ្នករកចំណូលពីពាណិជ្ជកម្មបាន៦០ទៅ៧០ភាគរយលើសប្រាក់ខែ អ្នកអាចពិចារណារឿងលាឈប់ពីការងារទៅផ្តោតចិត្ត និងពេលវេលាទាំងអស់ លើពាណិជ្ជកម្មថ្មីនោះបាន។

ផ្ទុយទៅវិញ ការហក់លោតដោយសារតែជំនឿចិត្តខ្វះភស្តុតាងជាក់ស្តែងបញ្ជាក់ថា អ្នកអាចរកប្រាក់ចំណូលដើម្បីទ្រទ្រង់ពាណិជ្ជកម្មថ្មីនោះបាន វាជាការប្រថុយខ្លាំងពេកហើយ។ ទោះជាអ្នកពូកែប៉ាន់ស្មានខាងហិរញ្ញវត្ថុយ៉ាងណាក៏ដោយ ក៏អ្នកមិនគួរប្រថុយក្នុងរបៀបមិនច្បាស់លាស់ដែឬ។

៣/ ការបង្កើតពាណិជ្ជកម្មមួយតម្រូវឱ្យមានជំនាញកម្រិតខ្ពស់

មនុស្សជាច្រើនជឿថា សហគ្រិនជោគជ័យសុទ្ធតែមានឆន្ទៈខ្ពស់។ ប៉ុន្តែបើរឿងនេះពិតបែបនេះមែន ពិភពលោកនេះប្រាកដជាមានចំនួនពាណិជ្ជកម្មស្មើនឹងចំនួនមនុស្សដែរហើយ។ សហគ្រិនភាពគឺរឿងជំនាញ ឬបើនិយាយឱ្យចំជាងនេះគឺបណ្តុំជំនាញ។ លោក DiPiazza ពន្យល់យ៉ាងច្បាស់ថា “មនុស្សងាយនឹងមានចិត្តស្ទុះស្ទាចំពោះគំនិតចង់បង្កើតពាណិជ្ជកម្មណាស់ ប៉ុន្តែការពិតគឺគេត្រូវមានជំនាញច្រើន ដើម្បីធ្វើពាណិជ្ជកម្មមួយ។ មនុស្សជាច្រើនមិនដឹងថា គេត្រូវការជំនាញច្រើនទេដើម្បីគ្រប់គ្រងពាណិជ្ជកម្មពិតប្រាកដ។” ការពឹងផ្អែកលើជំនាញពីខាងក្រៅ មិនត្រឹមតែជារឿងគួរធ្វើទេ ប៉ុន្តែជារឿងចាំបាច់ត្រូវតែធ្វើក្នុងសម័យបច្ចុប្បន្ននេះ។ អ្នកកំពុងតែគ្រប់គ្រងពាណិជ្ជកម្ម ដូច្នេះអ្នកមិនអាច សន្និដ្ឋានថាអ្វីៗគ្រប់យ៉ាងនឹងមានដំណើរការល្អនោះទេ។ មានជំនាញមូលដ្ឋានខ្លះដែលលោកអ្នកត្រូវការដើម្បីចាប់ផ្តើមដូចជា៖

-ធនធានមនុស្ស

-គណនេយ្យ

-គ្រប់គ្រង

-ម៉ាកឃីតធីង

អ្នកក៏ត្រូវមានសមត្ថភាពរក្សាតុល្យភាពជីវិតផ្ទាល់ខ្លួន និងជីវិតការងារដើម្បីមានកម្លាំងកាយចិត្តបន្តដំណើរវែងឆ្ងាយទៅមុខដោយជោគជ័យ។

ប្រែសម្រួល៖ វេហា

ប្រភព៖ Entrepreneur

បញ្ចេញមតិ