បំនិនអាជីវកម្ម | February 28, 2023

5គន្លឹះសម្រាប់សហគ្រិនទើបប្រឡូកក្នុងមុខជំនួញថ្មីថ្មោង

សហគ្រិនភាពជាការអភិវឌ្ឍឬជាការប្រែក្លាយគំនិតឱ្យទៅជាការពិតដែលរួមមានការធ្វើយុទ្ធសាស្រ្ត ការរចនា ការផ្តួចផ្តើម និងការគ្រប់គ្រងគំរូពាណិជ្ជកម្មថ្មី។ សហគ្រិនជាមនុស្សដែលនឹកឃើញគំនិតនៃការណែនាំពាណិជ្ជកម្មថ្មីជាមួយគំនិតច្នៃប្រឌិតនិងការបង្កើតថ្មីៗរបស់គេ។

មានសហគ្រិនច្រើននាក់ណាស់ដែលមានគំនិតអស្ចារ្យ ប៉ុន្តែគេខ្វះខាតផ្លូវដ៏ត្រឹមត្រូវ។ ក្នុងពេលជាមួយគ្នានេះដែរក៏មានសហគ្រិនជាច្រើននាក់ ដែលមានមហិច្ឆតាធំ ប៉ុន្តែស្ទាក់ស្ទើរនិងសង្ស័យមិនហ៊ានប្រថុយដែរ។

ហេតុដូច្នេះហើយដើម្បីជំរុញនិងលើកទឹកចិត្តសុបិន ពន្លកសហគ្រិនទាំងងនោះ ក្រុមអ្នកជំនាញបានប្រមូលគន្លឹះមួយចំនួនដែលអាចប្រែក្លាយជីវិតរបស់សហគ្រិនទាំងនោះឱ្យក្លាយទៅជាកំពូលអ្នកជំនួនញ៖

១/ ជឿជាក់លើខ្លួនឯង

ជំហានដំបូងបំផុតមុនពេលចាប់ផ្តើមដំណើរផ្សងព្រេងក្នុងពិភពជំនួញគឺត្រូវជឿទុកចិត្តខ្លួនឯង និងបណ្តុះជំនឿចិត្តក្នុងគំនិតនិងសមត្ថភាពរបស់អ្នក។ ការធ្វើឱ្យនរណាម្នាក់ជឿជាក់លើកិច្ចការដែលអ្នកកំពុងតែធ្វើមិនមែនជារឿងងាយស្រួលទេ ដរាបណាអ្នកមិនទាន់ជឿជាក់លើខ្លួនឯង។ ហេតុដូច្នេះហើយ ការទុកចិត្តនិងជឿជាក់លើខ្លួនឯងមានសារៈសំខាន់ណាស់ក្នុងគ្រប់កិច្ចការដែលអ្នកធ្វើ។ ឧបសគ្គនិងបញ្ហាជារឿងដែលជៀសមិនរួច ប៉ុន្តែអ្នកមិនត្រូវបណ្តោយឱ្យអ្វីមួយមករំខាន ឬសង្ស័យអំពីសមត្ថភាពនិងប្រសិទ្ធភាពរបស់អ្នកឡើយ។

២/ ទទួលស្គាល់អារម្មណ៍ភ័យខ្លាច

ការស្ទាក់ស្ទើរនិងការសង្ស័យចំពោះខ្លួនឯងពេលចាប់ផ្តើមធ្វើកិច្ចការអ្វីមួយជារឿងធម្មតាទេ ប៉ុន្តែអ្នកត្រូច្បាស់ថា អារម្មណ៍មិនទុកចិត្តទាំងនោះ មិនអាចគ្របដណ្តប់លើការសម្រេចចិត្តទាំងស្រុង ឬរំខានដល់ទស្សនវិស័យរបស់អ្នកទេ។ រឿងសំខាន់មួយទៀតគឺត្រូវតាមដាននិងដឹងឱ្យច្បាស់ថា មានកត្តាអ្វីខ្លះដែលធ្វើឱ្យអ្នកទន់ខ្សោយ ឬបញ្ឈប់អ្នកពីការសម្រេចបានសក្តានុពលពេញលេញ។ ទទួលស្គាល់ការពិតទាំងអស់នោះ ហើយស្វែងរកដំណោះស្រាយដើម្បីជម្រុះឧបសគ្គទាំងអស់ឱ្យអ្នកក្លាយជាមនុស្សដែលគ្មានអ្វីរារាំងបាន។

៣/ ហ៊ានប្រថុយ

ការប្រថុយនិងផលចំណេញតែងតែមានទំនាក់ទំនងជាមួយគ្នាជានិច្ច និងមានសមាមាត្រនឹងគ្នាគ្រប់ពេលគឺបើការប្រថុយកាន់តែខ្ពស់មានន័យថាផលចំណេញក៏មានកាន់តែច្រើនដែរ។ ប៉ុន្តែការជឿជាក់បែបនេះមិនមែនមានន័យថា ការខាតបង់មិនអាចកើតមាននោះទេ។ ហានីភ័យកាន់តែខ្ពស់ពិតជាបង្កើនឱកាសនៃការខាតបង់មែន។ ហេតុដូច្នេះហើយអ្នកត្រូវមានការប្រុងប្រយ័ត្នតាមរយៈការគិតគូរឱ្យបានគ្រប់ជ្រុងជ្រោយចំពោះផលប្រយោជន៍ខ្ពស់ក្នុងការរំពឹងទុក។ នេះជាការពិតដ៏គ្រោតគ្រាតនៃជីវិតពាណិជ្ជកម្ម ប៉ុន្តែមនុស្សជោគជ័យទាំងអស់សុទ្ធតែធ្លាប់ប្រថុយ ហើយក៏គ្មានរឿងរ៉ាវជោគជ័យណាមានលក្ខណៈពេញលេញដោយខ្វះការប្រថុយប្រកបដោយការគិតគូរយ៉ាងល្អិតល្អន់នោះទេ។

៤/ រៀនពីកំហុស

មនុស្សតែងតែមានទំនោរបង្កើតកំហុសជារឿយៗ។ ប៉ុន្តែអ្វីដែលសំខាន់គឺមនុស្សត្រូវចេះរៀនពីកំហុស និងទទួលយកមេរៀនទៅអនុវត្តដើម្បីធានានិងកាត់បន្ថយការបង្កើតកំហុសដដែលៗ។ កុំព្យាយាមមើលរំលងកំហុសរបស់អ្នក អ្នកត្រូវទទួលយកបទពិសោធន៍ ឬមេរៀនទាំងអស់ពីកំហុសទាំងនោះ និងសម្លឹងរកមធ្យោបាយបញ្ជៀសកំហុសទាំងនោះទៅថ្ងៃមុខ។ កំហុសអាចធ្វើជាគ្រួបង្រៀនដ៏ល្អបំផុតគ្រប់ពេលដោយសារវាជួយបង្រៀនអ្នកនូវមេរៀនជីវិតដ៏ល្អបំផុតមិនអាចរកបាននៅក្នុងសាលាឬគ្មាននរណាម្នាក់ឱ្យបាន។

៥/ យកពេលសម្រាកខ្លះ

ការធ្វើពាណិជ្ជកម្មអាចនឹងបណ្តាលឱ្យអ្នកអស់កម្លាំងកាយចិត្តនៅពេលខ្លះ ហេតុដូច្នេះហើយអ្នកគួរតែមានពេលសម្រាកខ្លះ។ អ្នកត្រូវចេះផ្តល់រង្វាន់ឱ្យខ្លួនឯងតាមរយៈការធ្វើសកម្មភាពដែលជាចំណង់ចំណូលចិត្ត ឬការធ្វើដំណើរកម្សាន្តទៅកន្លែងដែលអ្នកប្រាថ្នាចង់ទៅ។ លើសពីនេះទៅទៀត ក៏នៅមានសកម្មភាពជាច្រើនទៀតដែលអ្នកគួរតែមានសម្រាប់ខ្លួនឯងហើយមិនទាក់ទងនឹងពាណិជ្ជកម្ម ដូចជាការគូររូបភាព ការលេងភ្លេង ការសរសេរ ការអាន និងសកម្មភាពកីឡាផ្សេងៗ។ ចំណុចសំខាន់គឺត្រូវបង្កើតនិងរក្សាតុល្យភាពរវាងជីវិតការងារ និងជីវិតផ្ទាល់ខ្លួន។

ការធ្វើជាសហគ្រិនមិនមែនជាកិច្ចការងាយស្រួលទេ។ អ្នកត្រូវតែវិភាគគ្រប់រឿងរ៉ាវយ៉ាងប្រុងប្រយ័ត្ននិងយកចិត្តទុកដាក់បំផុតដើម្បីធានាឱ្យបានថា អ្នកប្រែក្លាយការគំរាមកំហែងទាំងអស់ឱ្យទៅជាឱកាសនិងចំណុចខ្សោយទាំងអស់ឱ្យទៅជាចំណុចខ្លាំង៕

ប្រែសម្រួល៖ វេហា

ប្រភព៖ Entrepreneur

បញ្ចេញមតិ