បំនិនអាជីវកម្ម | March 02, 2023

គន្លឹះជំរុញទឹកចិត្តបណ្តុះផ្នត់គំនិតនវានុវត្តន៍

ការធ្វើគំនិតឱ្យលេចចេញរូបរាងជារឿងអស្ចារ្យណាស់។ ទោះបីមនុស្សជាច្រើនយល់ថាគំនិតធំៗផុសឡើងក្នុងខួរក្បាលយើងក្នុងរបៀបផ្សេងៗ ដោយឥតប្រុងប្រៀបទុកមុន ក៏មនុស្សដែលអនុវត្តនវានុវត្តន៍ជាប្រចាំដឹងថា ដំណើរការបង្កើតគំនិតត្រូវមានកត្តាចូលរួមច្រើនណាស់។

ទោះជាអ្នកកំពុងតែត្រួសត្រាយផ្លូវទៅរកសហគ្រិនភាព ឬជាប់ផុងនៅក្នុងអន្ទាក់នៃស្ថានភាពដដែលៗក៏យុទ្ធសាស្រ្តទាំងប្រាំនេះអាចជួយបណ្តុះផ្នត់គំនិតនវានុវត្តន៍បានដែរ៖

១/ បណ្តោយឱ្យបញ្ហារបស់អ្នកធ្វើជាត្រីវិស័យ

មនុស្សដែលអនុវត្តនវានុវត្តន៍ និងសហគ្រិនជាមនុស្សដែលផ្តោតចិត្តលើលទ្ធផល។ ទោះបីដំណោះស្រាយរបស់មនុស្សទាំងនេះបង្កើតចេញទៅជា ផលិតផលឬពាណិជ្ជកម្មក៏គ្រប់ដំណោះស្រាយទាំងអស់នោះផ្តើមចេញមកពីបញ្ហាដែលពួកគេបានជួប។ មនុស្សដែលពូកែអនុវត្តនវានុវត្តន៍ នឹងកំណត់និយមន័យបញ្ហាយ៉ាងច្បាស់ និងគិតគូរយ៉ាងល្អិតល្អន់ មុនពេលគេគិតរឿងដោះស្រាយ។

២/ កុំបង្ខំការជំរុញចិត្ត ប៉ុន្តែត្រូវត្រៀមខ្លួនចាំទទួលវិញ

មនុស្សពូកែខាងនវានុវត្តន៍ដឹងថា គេមិនអាចរៀបចំផែនការទុកសម្រាប់គំនិតអស្ចារ្យនោះទេ ពីព្រោះគ្មាននរណាដឹងថាកម្លាំងចិត្តនឹងកើតឡើង នៅពេលណា។ ដូច្នេះកិច្ចការតែម្យ៉ាងគត់ដែលគេអាចធ្វើបានគឺប្រុងប្រៀប និងត្រៀមខ្លួនគ្រប់ពេល។ នៅក្នុងពេលត្រៀមខ្លួននេះ អ្នកមិនមែនថាមិនត្រូវធ្វើអ្វីសោះនោះទេ។ អ្នកអាចនឹងធ្វើសកម្មភាពផ្សេងៗ ដោយបើកចិត្តរំពៃមើលឱកាសជុំវិញខ្លួន។ កម្លាំងជំរុញចិត្តនឹងមិនកើតឡើងក្នុងរបៀបដែលអ្នកមិនដឹងខ្លួនទេ។

៣/ ដឹងថាអ្នកកំពុងតែស្តាប់ដើម្បីអ្វី

អ្នកចេះស្តាប់រួចទៅហើយ តាំងពីធំដឹងក្តីមក ប៉ុន្តែការស្តាប់ដោយគ្មានគោលដៅកម្រផ្តល់លទ្ធផលជាដុំកំភួនណាស់។ សូមរៀនរបៀបស្តាប់ ដោយមានបំណង។ មានមនុស្សនិយាយច្រើនណាស់នៅក្នុងពិភពលោកនេះទាំងក្នុងបរិបទផ្លូវការនិងក្រៅផ្លូវការ ប៉ុន្តែអ្នកត្រូវបង្ហាត់ ឱ្យត្រចៀកខ្លួនឯងត្រងស្តាប់តែពាក្យសម្តីណាដែលនាំទៅរកគំនិតថ្មីៗប៉ុណ្ណោះ។ ការចេះបែងចែករឿងដែលសំខាន់ពីរឿងឥតប្រយោជន៍ ជាជំនាញចាំបាច់ណាស់នៅក្នុងសម័យព័ត៌មានវិទ្យានេះ។

៤/ ធ្វើឱ្យកិច្ចការរបស់អ្នកជាការបំពេញបន្ថែម មិនមែនជាការប្រជែងទេ

ការធ្វើជាមនុស្សពូកែខាងនវានុវត្តន៍ ឬសហគ្រិនជាជីវិតដែលមានតម្រូវការច្រើនណាស់។ ប៉ុន្តែតម្រូវការច្រើនមិនមែនសុទ្ធតែជារឿងលំបាក ធ្វើទាំងអស់នោះទេ។ អ្នកអាចច្របាច់បញ្ជីការងារត្រូវធ្វើនិងតួនាទីបញ្ចូលគ្នាហើយធ្វើឱ្យផ្នែកទាំងពីរនេះជួយបំពេញគ្នាទៅវិញទៅមកបាន។ មនុស្សភាគច្រើនចូលចិត្តគិតរឿងរ៉ាវដាច់ពីគ្នា និងបែងចែកការងារទៅតាមប្រភេទនិងក្រុមផ្សេងៗ។ ប៉ុន្តែគំនិតនិងគម្រោងអាចលាយបញ្ចូលគ្នា បានយ៉ាងល្អ ហើយក្នុងករណីខ្លះទៀតក៏រីកចម្រើនដោយសារមានទំនាក់ទំនងជាមួយគ្នាទៀតផង។

៥/ កុំខ្ជិលឬសំងំនៅតែកន្លែងសុខស្រួល

នវានុវត្តន៍តម្រូវឱ្យមានសកម្មភាពហើយអ្នកមិនអាចបណ្តោយខ្លួនឯងឱ្យសំងំនៅតែកន្លែងងាយស្រួលបានទេបើអ្នកចង់រីកចម្រើន។ ជាក់ស្តែង អ្នកត្រូវហ៊ានគិតធំដើម្បីរាវរកនវានុវត្តន៍ ប៉ុន្តែអ្នកក៏មិនអាចព្រងើយកន្តើយនឹងកិច្ចការលម្អិតគ្រប់ជ្រុងជ្រោយដែរ។ មនុស្សនឹងកត់សម្គាល់ឃើញ សូម្បីតែកំហុសតូចតាច ឬកង្វះខាតអ្វីមួយ។ នៅពេលដែលអ្នកនិយាយថា “កុំបារម្ភអីអ្នកប្រើប្រាស់នឹងមើលមិនឃើញបញ្ហានេះទេ” មានន័យថាអ្នកខ្ជិលនិងខ្ជីខ្ជាចំពោះការងារហើយ។

ប្រែសម្រួល៖ វេហា

ប្រភព៖ Success

បញ្ចេញមតិ